Вятское старообрядчество
[Карта сайта] [Rus] 

 
Главная

Великорецкий крестный ход

Старообрядческие общины Вятской земли

О прошедших ВКХ

Основы православного вероучения

История старообрядчества

Молитвы

Литературная страница

Святые места

Проповеди пастырей

География старообрядчества

Видеоматериалы

Старообрядчество в сети Интернет

Файлы

Ссылки

Фото

Видео

Гостевая книга


 
О прошедших ВКХ

Повесть о явлении иже во святых отца нашего Николы Архиепископа Мирликийских, чюдотворнаго его образа Великорецкаго





Повесть о явлении иже во святых отца нашего Николы Архиепископа Мирликийских, чюдотворнаго его образа Великорецкаго, явившагося в области Вятския страны, в пределах Богоспасаемаго града Хлынова, в веси на Великой реке.

Источник: Рукопись «в лист», хранившаяся в библиотеке Свято-Троицкого и Николаевского Кафедрального собора г.Вятки (Хлынова). Писана во времена императрицы Елизаветы Петровны (1730-е годы)

Человеколюбивый в Троице славимый Господь Бог наш Исус Христос, иже везде сый и вся исполняяй, восхоте милостивое свое человеколюбие излияти, и Вятскую страну благодатию своею присетити, и угодника своего, во всяких бедах скораго помощника, великаго чудотворца Николы, чудотворный его образ чудесы прославити и всему миру явити, на славу всесвятому имени своему, и в похвалу церкви святей своей, во известнейшее познание приснаго присвоения святых Его к нему, силами же облагодатив того и источники исцелением от него произведе, его же явлением церковь православных да возвеселит и благочестивыя в вере да утвердит. Сопрослави его Господь Бог церковнаго ради утверждения и благочестия уяснения сицевым преславным явлением:
В лето мироздания 6891, от воплощения Бога Слова 1383, при державе великаго князя Димитрия Иоанновича Донскаго и при архипастырстве святейшаго Пимина митрополита Московскаго и всеа России, бысть явление чюдотворнаго образа Николы Великорецкаго чюдотворца, в Вятской стране, в некоей веси, четыредесять поприщ от града Хлынова, вскрай имянуемыя Великия реки, Вятския страны жителю Великорецкия веси, мужу некоему благоговейну, шествующу путем от своего дому, своея ради домовныя потребы, зрит близ Великия реки в чащи леса аки свещи многия горящия. Он же постояв мало не разуме бывшаго, иде в путь свой. И егда ему вспять возвратившуся к домови своему, паки видит той же свет на том же месте, и прииде близ онаго света идеже свещи горяху, и виде тамо икону стоящу, свещи же невидими быша. Он же о сем чюдеси зело ужасеся, и зрит с радостию вкупе и со благоговением явлшийся ему образ великаго чюдотворца Николы, и взем образ той постави его в дому своем, и о сем явлении чюдотворнаго образа никому же поведа. Стояше же той чюдотворный образ в дому поселянина того неколико время.
Хотяй же премилостивый Господь Бог наш наипаче прославити угодника своего великаго чюдотворца Николы и чюдесы удивити, по реченному во святем Его Евангелии: не может град укрытися верху горы стоя, ниже вжигают светилника и поставляют его под спудом, но на свещник возлагают, да светит всем, даде ему божественных своих чюдес силу струи чюдес источати, недуги уврачевати и всякия язи исцеляти, яко же древле быша в жизни его, и по святем его преставлении, многая и различная чюдеса излияшася, и язвами люте болящии исцелевахуся, и пагубных прегрешений струпы уврачевахуся. Таковую же благодать подаде и образу угодника своего великаго чюдотворца Николы.
В та лета веси тоя человек некий, именем Иоанн, лежал в разслаблении двадцать лет, и сему явися в тонце сне великий чюдотворец Никола и рече ему: поиди ко оному христианину, имя ему нарек, и обрящеши образ мой, стоящь в дому его, приложися к нему, и узриши славу Божию и получиши исцеление. Разслабленный же убудився ити не можаше, понеже не твердо сему явлению вероваше, помышляя во уме своем: где такову образу у того христианина быти. Во вторую же нощь паки явися святый Никола и рече к нему: аще сего не сотвориши, еже рекох ти, не имаши здрав быти. Возбнувшу же ему от сна, слыша в себе от болезни своея облегчение, и нача поведати домочадцем своим первое и второе явление святаго отца и чюдотворца Николы, и повеле себе подняти с постели своея, и егда двигнуша его, и абие муж той начат владети руками своими, и перекрести лице свое крестным знамением, на ногах же един еще идти не можаше, но родителие вземше того болящаго поведоша в дом преждереченнаго христианина. И егда приидоша к домови тому, иде же образ великаго чюдотворца стояше, видеша свет велий, аки свещ возженных множество стояше пред чудотворным его образом. Разслабленный же, пад пред образом великаго чюдотворца Николы, со слезами моляшеся о своем исцелении, и востав от земли приложися к чюдотворному его образу, внезапу совершенное себе получити исцеление, и бысть здрав, прослави Господа Бога и Его угодника великаго чюдотворца Николы о своем исцелении. Христианин же той, у него же стояше чюдотворный образ великаго чюдотворца Николы, видев таковое преславное великое чюдотворение, вельми ужасеся, и нача поведати о явлении того чюдотворнаго образа: како идущу ему путем, домовныя ради своея потребы, и како виде в чащи леса во стране пути своего, близ Великия реки, свещи горящия, и обрете той многоценный образ великаго чюдотворца Николы и принесе его в дом свой, и до того времени како у него стояше в небрежении.
Слышавше же сие преславное чюдо великаго чюдотворца Николы, веси тоя окрестнии людие собрашася с женами и детьми к дому тому, и видеша того разслабленнаго здрава, удивившеся великому чюдеси сему, прославиша Господа Бога и великаго чюдотворца Николы. И обещашася во имя великаго чюдотворца Николы на том месте, иде же явися той чюдотворный образ, часовню поставити. И егда совершивше часовню, по своему обещанию, поставиша той чюдотворный образ в часовне, и начаша паки многая чюдеса от него бывати. Произыде же слава о сем чюдотворном образе во всю страну Вятскую, и прихождаху в часовню множество христиан, молитися чюдотворному его образу, кождо своя недужныя к нему носяще; и многая чюдеса от того чюдотворнаго образа великаго чюдотворца Николы начаша всюду простиратися: слепии прозираху, разслаблении исцелевахуся, и всякими недуги одержимии, приходящии с верою к чюдотворному сему образу, никогда же тщи отхождаху, но вси исцеление приимаху.
Егда же вси людие видеша таковая бывающая преславная многая чюдеса от сего святаго образа, обещашася во оной веси во имя святаго отца Николы церковь воздвигнути. И избравше место, где быти церкви, начало благовосприемлют, Господа Бога на помощь призвавше: послаша мужа искусна в царствующий град Москву ко святейшему митрополиту в та лета бывшему, молиша его, дабы благословил их церковь воздвигнути во оной веси, по их обещанию, во имя великаго чюдотворца Николы чюдотворнаго образа его Великорецкаго. И многая чюдотворения, от того святаго образа бывшая, первопрестолнику святейшему митрополиту возвестиша. Митрополит же, слышав таковая, вельми почюдися, и прослави Господа Бога и угодника Его великаго чюдотворца Николы, посылает со оным мужем свое архипастырское благословение на создание храма того, благословенную свою архипастырскую грамоту, и повелевает храм воздвигнути в веси той во имя великаго чюдотворца Николы чюдотворнаго его образа Великорецкаго, даде же ему на освящение храма того святый антиминс. И не по мнозе времени людие, древеса изготовльше, обложиша храм древян на пререченнем месте, и вечеру наставше, зиждущии людие разыдошася в домы своя. И на утрие пришедше на место, и основания храма, ни прочих древес тамо ничесоже узреша, токмо все место оно праздно обретоша. Страхом же и ужасом вси людие одержими бяху: сюду и овоуду желаемаго обхождаху много ищуще, понеже бо место оно лесом учащено бяше. И се обретоша желаемое преславное видение: не в далнем разстоянии на блате основание храма того стояше цело и весма нерушимо, и древеса приготованная обретошася на том же месте, и аки бы с местом онем всему принесену бывшу. Удивльшеся великому чюдеси сему, и вси прославиша Господа Бога и великаго чюдотворца Николы. И начаша на том Богоизбраннем и чюдеснем на пренесеннем месте созидати храм, и тогда благоволением Божиим и великаго Архиерея Николы чюдотворца молитвами место оно, еже прежде бысть блато, сухо бысть и преизрядно, и доныне всеми видимо.
И егда храм той совершиша, и ко освящению приспе, и тако архипастырским благословением освятиша его, и той многочюдесный образ великаго чюдотворца Николыиз часовни пренесоша и поставиша в новосозданнем и освященном храме, его же создаша во имя его святое, и в нем многая и неисчетная чюдеса от святаго его чюдотворнаго образа быша, с верою приходящим, здравие душам же и телесем своим врачевание богатно почерпающим, яко от источника богатоточнаго изливающагося, туне бо проливаются источницы благодатных его целеб, присно от него кипят богатыя благодати.
Приидите вси усердно верующе, и не отьидете тщи. Его же желаете, обрящете, не отринется от желания вашего. Божия бо благодать действует в нем различными благодеянии: благочестивыя озаряющи веселит цельбоносными источники, иже от святаго его образа исходящими; приседящия утешает словесными светозарными струями, палимыя зноем душевредных страстей прохлаждает. Но к повести да шествует слово.
В та времена, за умножение грех наших, Вятскую страну воеваху, почасту невернии Казанских улусов Черемиса, и многажды прихождаху ко храму святаго Николы чюдотворца, хотяще его огнем пожещи; храм же святаго им неверным на многи часы невидим бываше, иногда же на высоте его зряху, отхождаху бездельни, страхом же и ужасом одержими бяху, ничто же сотворити могуще. Правовернии же людие веси тоя, сия преславная чюдеса видевше, прославиша Господа Бога и великаго чюдотворца Николы, творящаго таковая преславная и превеликая чюдеса, и поведаша сия вся в Богоспасаемом граде Хлынове.
Того же Богоспасаемаго града вси людие, слышавше о многочюдесном сем образе, и о нахождении неверных, совет благ о том всенародне сотворше, восхотеша той чюдотворный образ великаго чюдотворца Николыс Великия реки взяти в Богоспасаемый град Хлынов. Веси же тоя священник храма святаго Николы чюдотворный его образ помысливше со христианы взяти, хотяще нести в Богоспасаемый град Хлынов, и чюдотворный образ от места своего никако же подвижеся. Священник же той, шед во град, поведа сие чюдо гражданом. Граждане же, паки совет сотворше, еже молити о сем Господа Бога и великаго чюдотворца Николы, и постившеся, послаша священников из Богоспасаемаго града Хлынова на Великую реку со тщанием по чюдотворный образ святаго отца Николы. Егда же посланнии от града священницы приидоша на Великую реку, вшедше во храм святаго отца Николы и певше молебная, хотяще той чюдотворный образ взяти и нести в Богоспасаемый град Хлынов, он же паки не подвижеся от места своего, яко же и прежде. И тако молебная совершивше и помолившеся отъидоша печальни, таковаго не получивше дара. И поведаша паки в Богоспасаемом граде Хлынове сие второе чюдо, како чюдотворный образ не подвижеся от места своего. Богоспасаемаго же града Хлынова людие от велика и до мала, страхом и ужасом одержими, взываху: Господи помилуй!
Православнии же и боголюбивии людие града сего вси со усердием обещашася паки второе поститися и молити о сем всесильнаго в Троице славимаго Господа Бога, и святаго отца Николы на помощь призывающе, во еже бы святым чюдотворным своим образом присетил град Хлынов и люди в нем живущия; а где явися чюдотворный его образ, обещашася на Великую реку, с тем чюдотворным его образом, всенародне своим люботрудным тщанием работати всегда неотложно, и ходити самим по вся лета непременно на чюдотворное его место, и тамо праздновати, месяца маия, по празднестве честных его мощей пренесения, еже от Мир в Бар град, в день недельный; и паки, в Богоспасаемый град Хлынов с Великия реки пришедши, узакониша сретение чюдотворному его образу, не дошед до града Хлынова за пять поприщ, на месте рекомем Филейки, в Богоспасаемом же граде Хлынове ожидати той чюдотворный образ и встречати с великою честию, со всенародным множеством. И по сему своему всенародному обещанию, паки послаша из Богоспасаемаго града Хлынова священнаго чина и с ними избранных мужей.
Егда же посланнии от града священницы и избраннии людие приидоша на Великую реку, со тщанием в чистей совести, и во храм вшедше, всесилному и пребожественному в триех ипостасех славимому Богу, и пречистей Его Богоматери, и великому чюдотворцу Николаю, вечернее и утреннее славословие боголепно воспеша и молебная совершивше, чюдотворный образ великаго чюдотворца Николы со многим тщанием и страхом подъемше: и не яко же прежде, не подвижеся от места своего, но аки сам пойде в путь свой. Они же на своя рамена честне его возложиша, с кадилы и свещами, и богодухновенными песнми, великолепне в Богоспасаемый град Хлынов понесоша. Богоспасаемаго же града Хлынова вси людие, яко услышавше сего всечестнаго дара, великаго чюдотворца Николы чюдотворнаго его образа, с Великия реки в Богоспасаемый град Хлынов пришествие, возрадовашася радостию велиею зело, сретоша той чюдотворный образ за градом в пяти поприщах, на предреченнем своем обещанном месте, с великою честию и радостию со слезами. Егда же приближашася ко граду с чюдотворным его образом, паки сретают священницы с честными кресты, и сотворяют хождение с чюдотворным его образом около града, со святыми иконами и со всенародным множеством, и поставляют той чюдотворный образ в церкви, внутри Богоспасаемаго града Хлынова, с подоболепными похвалами.
И в лето 7059 (1551) Вятския страны жителем града сего и поселяном, по прежде бывшему своих прародителей обещанию, отложившим ходити с чюдотворным образом великаго чюдотворца Николы на Великую реку, на чюдотворное его явленное место, и сего ради, за умножение грех наших, во всей Вятской стране мразу велию належащу в летнее время, месяца июния с перваго до втораго надесять числа, претимо бысть всем гладом истаяти всеконечне. Людие же о сем страхом и ужасом одержими бяху, познавше таковое свое прегрешение, паки обещашася с чюдотворным его образом на Великую реку, на чюдотворивое его явленное место, по вся лета ходити неотложно. И егда с теплыми слезами припадающе к чюдотворному его образу и прощения о своем согрешении просяще, паки ходити начаша, и тогда, теплыми молитвами и заступлением святаго отца Николы, показа Господь Бог преславное свое милостивное чюдотворение: бысть во всю страну Вятскую теплота велия и изобилие плодов земных.
Сему же подобно и в нынешняя времена и лета в Вятской стране творится еще и до ныне: егда бывает шествие на Великую реку с чюдотворным образом великаго чюдотворца Николы из Богоспасаемаго града Хлынова, тогда граждане и поселяне, забывше прародителей своих обещание, овии ради куплей, инии же домовных своих потреб ради, овии же леностию одержими суще, а инии безведрия ради идти нехотяще, остающеся того шествия, чающе в домех своих в та времена себе приобрести и получити некое приобретение, и сего ради тии людие нетокмо прибыток, но тщету и скорби мнози, лености ради своея, приемлют. И паки полагают обещание ходити с чюдотворным его образом на Великую реку по вся лета и до кончины жизни своея неотложно, и друг друга на сие подтверждают шествие с чюдотворным его образом на Великую реку.
И во прешедшая убо времена и лета, даже и до ныне, от святаго его чюдотворнаго образа многая и неисчетная чюдеса содеваются, слепии бо и хромии и разслабленнии и всякими неисцельными недуги одержимии, прикосновением чюдотворнаго его образа, с верою приходящии, всякую пользу неоскудно, душам же и телесем своим здравие и исцеление приемлют. И тех многоразличных чюдес отчасти и прежде написано бысть не мало, и судбами Божиими, грех ради наших, во граде Хлынове соборная древяная церковь от огня воспалися, с нею же и написанная святаго отца и чюдотворца Николы преславная чюдеса небрежением от пламени погореша; чюдотворный же образ великаго чюдотворца Николы от великаго оного пламене, волею Божиею, весьма цел и невредим обретеся.
И сему подобно, яко же в преждебывших летех во граде Ругодеве чюдо преславно сицевое: схизматику некоему в том граде варящу пиво, обретоша тии зловернии у иного немчина в дому две святыя иконы: на единой написан образ пресвятыя Богородицы с превечным младенцем, на друзей же образ великаго чудотворца Николы и святаго священномученика Власия и святых чюдотворцев Космы и Дамиана, и сия святыя иконы они зловернии восхитивше, течаху ко огню несуще, иде же пиво варяху, ругающеся святым иконам глаголаху христианом: сие ваше поможение и заступление, да помогут сами себе и поклоняющимся, и тако смеющеся купно тыя иконы под котел во огнь ввергоша. О Божиих судеб и дел преславных! Разлияся ругодевскаго пива пламень, яко же и в пещи халдейстей, и протече по всему граду яко молния с зельною скоростию, вся храмины и стены града до конца попали. Тогда манием Пресвятыя Богородицы и святых угодников помощию, православнии людие, приемше град, взыскаша место пивоварения оного, иде же под котлом ввержени быша честныя иконы, их же ради возсвирепися пламень и пояде весь град, обходяще искаху по опаленному месту оного града, и пепел разсмотряюще, обретоша оны святыя иконы вся целы и никако же опаления прикосновенны, со страхом же и радостию душевне благочестивии людие от персти и пепела их подъемше. О чюдесе преславнаго! Яко же древле в пещи халдейстей три отроки от огня спасый, сице и тамо Господь Бог наш чюдодействова, соблюде во пламени неопалимы сия святыя иконы. Таяжде Божественная Его благодать и зде чюдодействова святыми своими и всесильными судбами, многочюдесный сей образ великаго чюдотворца Николы от самого пламене сохранен бысть Божиею силою, никако же огню коснувшуся, но всецел и нерушим сохранися.
Православнии же народи, видевше преславная и неизреченная чюдеса таковая, исходящая от чюдотворнаго сего святаго образа, паки обещавшеся всею Вятскою страною внутри Богоспасаемаго града Хлынова воздвигнути новый храм во имя святаго отца и чюдотворца Николы, еже и бысть со благословением и повелением архипастырским, иже тогда бывшаго в царствующем граде Москве. Внегда же благочестивии людие, теплою верою подвизаеми, начаша созидати новый храм великаго чюдотворца Николы, и Богу поспешествующу вскоре ему к совершению, тогда избравше от себе мужи духовны, послаша в царьствующий град Москву ко святейшему первопрестольнику, иже в та лета бывшему, и о совершении храма великаго чюдотворца Николы, и о чюдесех его архипастырю возвещают. Он же повелевает на освящение храма того дати святый антиминс. Егда же посланнии, возвратившеся из царствующаго града Москвы, дошедше Вятския страны, и в Богоспасаемый град Хлынов приидоша, и о освящении храма великаго чюдотворца Николы повеление первопрестольника священником и всенародному множеству возвестиша: священницы же и людие Богоспасаемаго града Хлынова повелевают проповедати во всей Вятской стране, на освящение храма того уреченный день именоваша, во еже всем людем пост и молитву восприятии заповедаша, и тако благоговейне ко освящению того храма приходити. Вятския же страны людие, слышавше о освящении храма великаго чюдотворца Николы, возрадовашася радостию неизглаголанною, и Богу помогающу, с постом и молитвою шествуют в Богоспасаемый град Хлынов, на освящение храма великаго чюдотворца Николы, притекше с великим тщанием и благоговеинством, и освящению храма совершившуся, движут некрадомое и безценное богатство, всечестный и многоцелебный образ великаго чюдотворца Николы, и поставляют его в новосозданнем и освященном храме, на просвещение и утверждение Богоспасаемаго града Хлынова, в похвалу же и славу предибудущим родом, всея Вятския страны жителем, яко некое светило благочестия и всея вселенныя великое сокровище предрагое, точаще неоскудныя источники цельбоносным своим образом: многая бо тогда и различная исцеления бываху от святаго его чюдотворнаго образа всем с верою приходящим, даже и до ныне точит цельбоносный его образ всем недужным врачевание душевное и телесное, яко некий едемский источник, изливаем неоскудевает, и черплющии насыщаются всякаго благодеяния.
Приидите вси и видите дела Божия, как убо нас призывает Господь в пресветлый свой рай, еже есть соборная церковь, в ней бо благочестивии озаряются правою верою Богоначальныя и Живоначальныя Троицы множае и паче солнечных луч, в ней же есть исходящая река богословия, в ней же плодове веры, апостольская писания, в ней цветы словесныя, учения блаженных учителей; воистину Божественный рай соборная апостольская церковь, тамо же и пророк призывая глаголет: приидите, взыдем на гору Господню и в дом Бога Иаковля, и скажет нам путь свой, и пойдем по нему. Приседим источнику благодати Божия, образу великаго чюдотворца Николы, ныне страждущии, приемлюще от него всяким неисцельным недугом исцеление, не яко бо овчая купель, иже в притворе Соломонове, на коеждо лето единаго исцелеваше, но зде и на кийждо день, аще хощеши, и на всякий час источает неоскудно от святаго своего образа богатное исцеление всем с теплою верою приходящим к чюдотворному его образу.
И о таковых преславных и многоразличных чюдесех, истекающих от цельбоноснаго и чюдотворнаго его образа, возвещено бысть писанием в слухи самодержавнейшему благочестивому государю, царю и великому князю Иоанну Васильевичу всея России. Он же благочестивый великий государь, слыша таковая преславная чюдеса от чюдотворнаго того образа великаго чюдотворца Николы, возрадовася радостию превеликою, желая усердно, во еже бы ему великому государю той чюдотворный образ видети и поклонитися; и свое царственное писание посылает на Вятку, дабы с тем чюдотворным образом великаго чюдотворца Николы быти к нему великому государю в царствующий град Москву. И в лето 7060 (описка – должно быть 7063, то есть 1555 года от Р.Х. – прот. А.Б.) февраля в 23 день по его царскому велению, с тем многочюдесным и целбоносным великаго чюдотворца Николы образом, отпущаются с Вятки к нему великому государю к Москве того святаго храма священницы с причетом, и его царским повелением пути касаются, с целбоносным образом великаго чюдотворца Николы пришедше к Москве. И тогда на пути и в царствующем граде Москве многая и преславная чюдеса быша, всякими различными болезнми одержимым, всем притекающим, с верою просящим и прикасающимся целбоносному его образу: исцеления дары неоскудно приемлющи с радостию в домы своя отхождаху, славяще Господа Бога и Его угодника великаго чюдотворца Николы, яко же и в тропаре его, иулия месяца в 29 день, на пренесение святаго его чюдотворнаго образа от Вятки в царствующий град Москву, напечатано сице: «многая убо чюдеса во пришествии своем сотвори, болящия исцели, и вся человеки удиви». Сего ради повелением самодержавнаго царя списася с того чюдотворнаго образа святителя Николы список, на просвещение и моление всем людем царска града; даже и до днесь в царствующем преименитом граде Москве той преписанный образ стоит во святей соборней церкви видим и поклоняем всеми.
Чюдотворный же образ великаго чюдотворца Николы, рекомый Великорецкий, повелением благочестиваго государя, царя и великаго князя Иоанна Васильевича всея России самодержца, обложен на Москве, его царскою казною, новым чеканным окладом, и позлащен с чернью, а в средине образ великаго чюдотворца Николы обложен ризою от злата чиста, с драгим камением украшен; а прежде бывшей с того чюдотворнаго образа древний оклад указал благочестивый государь отдать на Вятку в соборную церковь. И повелел той чюдотворный образ отпустить с Москвы и проводить на Вятку до Богоспасаемаго града Хлынова, с подобающею великою честию и молебством. Отпущен же бысть той чюдотворный образ с Москвы на Вятку, в соборную церковь, в лето 7064 месяца августа в 25 день, при нем же великом государе царе и великом князе Иоанне Василиевиче всея России самодержце, и при святейшем Макарии митрополите Московском и всея России. А из царствующаго града Москвы до Вятки той чюдотворный образ от царя государя послан проводить, со тщанием и молебством благолепне, от духовнаго чина с Москвы Вознесенскаго монастыря протопоп Димитрий со священники и диаконы. И достигше с чюдотворным образом на Вятку Богоспасаемаго града Хлынова, проводивше той чюдотворный образ, поставиша во всечестнем его соборнем храме, и по молебнем пении помолившеся, отъидоша к царствующему граду Москве с великою радостию, понеже видеша в путнем шествии от святаго его чюдотворнаго образа многая и неизчетная чюдеса и исцеления всяким различным недугом, здравие и целбу подающа всем, иже с верою просящим, неоскудно.
Но кто возможет святых благодать изчести, на всякое бо время, аки рекам текущим целбам от святых на всяком месте, иде же призываеми бывают, непрестанно исцеления точатся, не точию же зде у чюдотворнаго его образа действуются, но и везде, на всяком месте и во всяком обстоянии, всем призывающим его великаго чюдотворца Николы с верою: предстоя и помогая спасает всегда от всяких скорбей и бед и напастей. Зде же воспомянути подобает божественнаго апостола Павла глас: о глубина богатства премудрости и разума Божия, яко неиспытанны судбы Его и неизследованни путие Его! Той же глас ныне и нам возопити лепо, видевшим преславная и чудная дела Господня, како премудрости своея манием, и зде преславным явлением образа святителя своего и чюдотворца Николы, благочестие уясни, и злочестие обличи, и православныя во благочестии утверди.
И по прошествии многих лет, егда Божиим промыслом восприят скипетр царствующаго града Москвы и всея России благочестивейший великий государь царь и великий князь Михаил Феодорович, и возвещено ему великому государю от многих бысть, како в прежняя лета были с чюдотворным образом великаго чюдотворца НиколыВеликорецкого на Москве с Вятки, блаженныя памяти при благоверном государе царе и великом князе Иоанне Васильевиче всея России, и како в царствующем граде Москве многая и безчисленная чюдеса от святаго того чюдотворнаго образа быша. Он же благочестивейший государь, царь и великий князь Михаил Феодорович всея России самодержец, подражая прародителю своему, восхоте со всежеланием, во еже бы той пречестный образ великаго чюдотворца Николы и ему великому государю в преименитом царствующем граде Москве видети и святому его чюдотворному образу поклонитися, и молебная ему пения совершити. И повелевает свое царское писание послати на Вятку, чтобы с тем многоцелебным великаго чюдотворца Николы образом итти в царствующий град Москву с Вятки Богоспасаемаго града Хлынова соборныя церкви священником с причетники, и нести той целбоносный образ с подобающею великою честию и бережением.
Отпущен же бысть той чюдотворный образ святаго отца Николы с Вятки к Москве в лето 7123 (1614) месяца септемврия в 1 день; принесен же бысть той многоцелебный образ с Вятки к Москве того-ж 7123 года (1614) месяца ноября в 23 день, на память святаго апостола Филимона, и пребысть той святый чюдотворный образ в царствующем превеликом граде Москве неколико время, источая от святаго своего целбоноснаго преславнаго и многоцелебнаго образа многоразличная исцеления всем, иже несумненною верою к нему приходящим и милости от него просящим.
И повелением его великаго государя, царя и великаго князя Михаила Феодоровича всея России самодержца, устроен к тому святому образу, от его царских сокровищ, в привес крест златый со святыми мощми, да убрус низан жемчугом с дробницами. И повелел государь той святый чюдотворный образ паки с подобающею честию, со благоговением и молебством, отпустить на Вятку, на прежнее его чюдотворное место; отпущен же бысть из царствующаго града Москвы во страну Вятскую, в Богоспасаемый град Хлынов, в соборную церковь, той многочюдесный образ великаго чюдотворца Николы Великорецкаго того ж 7123 года (1614) маиа в 5 день.
Воспомянути же нам подобает и сие преславное повествование, и прославити о сем Господа Бога и его угодника великаго чюдотворца Николы, о преславных и многоразличных чюдесах, бывших от целбоноснаго святаго и многочюдеснаго его образа рекомаго Великорецкаго: егда бяше шествие с чюдотворным и многоцелебным образом великаго чюдотворца Николы, по первому и второму великих государей повелению, с Вятки до Московскаго государства, и паки возвращающеся из Богохранимаго царствующаго града Москвы до Вятския страны, в путних шествиях, во святых церквах, во градех и селех, и боголюбивых домех, иде же со святым его чюдотворным образом быша, молебная совершающе, не токмо прикосновением чюдотворнаго его святаго образа, с теплою верою приходящим, различныя и долговременныя недуги исцелевахуся.
По писанному в книзе Пролозе, октоврия месяца в 31 день, в страдании святаго мученика Епимаха реченное: жена некая при мучении святаго предстоящи и едино око слепо имущи, и выну на святаго неуклонно взирающи, велие некое чюдо содеяся с ней: стружему бо святому, скочи капля крове во око жене, оле чюдесе, прозре оком и свет ей даровася. Такожде и от святаго сего многочюдеснаго образа великаго чюдотворца Николы содеяшася: в пути по водам, иде же шествие целбоноснаго образа бяше, от текущия воды, яже в руку веслами работающих людей, окроплением на лица слепии прозираху, хромии хождаху, глусии благоуслышание, немии светлоглаголание приимаху неоскудно, и во всяких неисцелных недузех здравие и пользу почерпаху. Яко от неистощимаго источника, от святаго его чюдотворнаго образа, преславная и неизчетная чюдодействия от тогда и даже до ныне неоскудевая точит и до сего дне, во вся грады и страны и веси чюдеса изливает всем с теплою верою и любовию притекающим к чюдотворному сего святому образу, яко же свидетельствуют о сем Богодарованная преславная чюдеса его на Вятке, в Богоспасаемом граде Хлынове, во святей соборней и апостольстей церкви Живоначальныя Троицы и святаго честнаго имене его, во храме сего великаго чюдотворца Николы, нарицаемаго Великорецкаго, от чюдотворнаго его и многоцелебнаго образа бывающая, и во святей его книзе написанная, иже во прежде бывших и нынешних временех и летех, и до днесь совершаемая всем, иже с верою и любовию притекающим во святый храм Его и зрети желающим, невозбранно желаемаго да сподобятся видети и многоразличных его чюдес насладитися, глаголющим сицевая: о предобрый сей во градех, откуду имаши в себе неистощимое сие и многоценное сокровище? Вем, яко от Бога свыше посланный всечестный дар, целбоносный и многочюдесный образ великаго и преславнаго отца и предивнаго чюдотворца Николы, яко же некий едемский источник, различная источаяй исцеления всем к нему притекающим с верою, и почерпающим обилную здравия и спасения ползу, на всякое прошение подает некоскудное дарование.
Блажени же сего Богоспасаемаго града людие, стяжавшии таковое предрагое, от Бога посланное, безценное богатство, Христоименитому сему стаду поданное, на прославление православию, и всей Вятской стране стена и забрало, градовом же и весем утверждение, святым церквам на просвещение, во славу же и красоту и благолепие предибудущим родом в наследие неотъемлемо.
Блаженно же и место, иде же прослави Господь Бог и яви, в пределе града нашего, таковаго превеликаго светилника, просвещати могущаго вся страны многочюдесным своим явлением, и светозарным чюдотворнаго его образа пришествием украсившаго святую свою соборную и апостольскую церковь и чюдесы во вся концы земли прославльшаго.
И сего ради, за благословением архиерейским, дерзнухом мало нечто на похвалу великаго и пречюднаго святаго отца Николы Великорецкаго чюдотворца, чюдотворному его образу хвалословие в пениих, молитвах и канонех, и многобогатных преславных чюдес его, яже обретены во святей соборней церкви, всенародному множеству, во общую пользу, в похвалу же и славу, вашему любочестию предложити. Вы же, христоименитое избранное Божие стадо, вси правовернии людие, святыя церкве сынове, чтущии же и преписующие сия многоразличная преславная и превеликая чюдеса великаго светилника и чюдотворца Николы, содеянная пречестным и многочюдесным цельбоносным его образом, не мните, яко от своего разума написахом, но надеющеся на помощь Всесильнаго и Всемогущаго в Троице славимаго Бога, милости от Него и помощи просяще, и от преизящнаго и изряднаго Его угодника, великаго архиерея Николы вселенскаго чюдотворца. Преславных чюдес его елико обретохом, сие и писанию предахом, в честь, похвалу же и славу предибудущим родом, о Христе Исусе Господе нашем, Ему же от всех человек подобает приносити хвалу, пение, благодарение и поклонение, творящему вся полезная рабом своим, святыми своими угодники, ныне и присно и во веки веков. Аминь.

 Православный Християнский Календарь v2.0
Объявления
[ Все объявления ]

Новости
Расширяем культурные связи

Разрешат превысить нормативы для храма на Филейке

Старообрядцы Заречной общины г .Нижнего Новгорода просят о помощи в строительстве храма

Итоги круглого стола "История старообрядчества Вятской губернии"

Рабочая встреча в Общественной палате Кировской области

Храм растет!

Унинские християне просят помощи в строительстве храма

Закладка храма в поселке Уни

Просветительский отдел Московской Митрополии приглашает на бесплатный онлайн-курс «Введение в христианство»

Богослужение в Неделю о мытаре и фарисее

[ Все новости ]

 

 

 

 

 

 

 

 

 

 

 


Designed by sLick Copyright © 2007